reflexion can 25 Noviembre 2008

Nasa nueva caceres na aco can sinurat co ini, nagsurat lang aco, siguro sa sobrang capagalan sa buhay.buhay na mayong gibo:

Dai aco masurat na an darang pagtubod, importante an mga sasabihon co asin importante aco.

An tamang rason cung tano aco nasurat iyo na mismo an tinataong caogmahan can pagsurat asin pagpahayag can sadiri. Iyo ini an importancia can pagsurat.

Masurat aco baco sa cadaculan can sasabihon co cundi sa carahayan asin caogmahan nin pagheras can sacong mga naaaraman.

Dai gabos matubod. Mayo yan sacuya. Baco sa pagyamyam cundi sa pagguibo nin saysay.

tabo

Ginibo mo cami para Saimo asin dai mauntoc an puso hanggang dai ini nagpapahingalo Saimo.

-San Agustin

Can naglalacao si San Agustin sa may baybayon, naghohorop-horop tungcol sa Santisima Trinidad, nacahiling sia nin aqui na nagcacalot nin labot sa baybayon.
Hinapot nia ini, 'anong ginigibo mo?',
simbag can aqui, 'nagcacalot aco, ililipat co digdi an tubig can dagat'.
Sabi nin Santo sa aqui, 'imposible an ginigibo mo, dai maigo an dagat sa labot na yan'.
Sabi can aqui sa Santo, 'an isip nin tao arog can labot na ini na pirit na iniintindi and misterio nin Dios na arog can dagat."
pirit na tinatabo can isip nin tao an tubig can mahiwason na dagat nin misterio can Cagurangnan.
sa huri dai ni caya can isip. maduda ta dai naabot. mawawara habang naghahanap. marayo habang nagrarani.
aco maogma ta masqui guranong rayo ta, minadoloc an Cagurangnan satuya gabos. dificil ang buhay na ini. complicado. kiisay kita masarig? kiisay kita maduman? ngonian na aram ta na, na tabo lang ang isip cumpara sa mahiwason na misterio nin Cagurangnan.

pahingalo

napapagal an isip saca an hawac caya caipuhan magpahingalo.
dai magtrabaho na sobra sa capacidad can hawac asin isip.
aanohon an cuarta cung rapac na an salud?
pero maraot man an sobrang pahingalo. mayo nang cuarta...
mapapadad pa. maculog sa payo an sobrang turog.

nacacaraot nin payo an sobrang trabaho nin utac.

caya ngani pahingalo ta pagal. baco yan pahingalo pag dai ca pagal.

an nagbubuhay can sadiri iyo an pagpagal..an trabaho.
an nagbubuhay can sadiri iyo an pahingalo..an pagturog.
manganaan ca can saro sa duwa, maraot an epecto.

caya importanteng isipon an mga bagay na tama lang pagpagalan,
masasayang an oras sa mga bagay na mayong camanundanan.

pangangaipo

'dai kita nabubuhay para sa sadiri lamang' sabi can sarong canta.

totoo man nanggad ta iminundag kita na nangangaipo. nangaipo kita nin pag-ataman can satuyang mga magurang, nangaipo kita can saindang atencion asin pagcamoot asin nangaipo kita can mga material na bagay para mabuhay kita.kita minasarig asin minatubod dahil sa satuyang mga pangangaipona aram tang dai ta cayang itao sa satuyang sadiri.tama lang na sabihon na an buhay na ini pano nin mayong cataposan na pangangaipo.nagpopondo man lang kitang mangaipo cung gadan na kita. natura ta na siguro ini, an mangaipo.

iguang nagsisimbag can satuyang mga pangangaipo. may mga bagay na caipuhan ta talaga. minsan ang iba baco naman importante, pero kinacaipo ta...basta sana magcaigua kita can mga bagay ta iyo an uso. iyo na ini padikit dikit na pagtalubo nin pagiging materioso. dai na matuninong sa pagturog ta nauuri an puso. mayo na nin catoninongan.
isipon ta...mas importante an mga taopng caipuhan ta saca an mga taong nangangaipo satuya.

iguang mga pangangaipo na kita lang an macacasimbag. kita mismo an kinacaipo can mga taong culang nin atencion asin pagcamoot.

patara tara

mapoon aco sa pagtao nin importancia sa satuyang dialectong Bicol. saro sa mga linguaheng nanudan cong gamiton magpoon cadtong aco aki pa. instrumento nin pakikipagcapwa, instrumento nin pag comunicar o pagpahayag can satuyang sadiri. minsan an isip ca nasa contexto nin bicol, minsan ingles, minsan tagalog...dacula ang pagcacaiba can mga tataramon sa iba ibang contexto.minsan nawawara si totoong pagmate o natura can mensahe na gustong ipaabot pag ginibong ingles an bicol, an bicol ginibong tagalog...sa translation, minsan culang ang minaluwas na mensahe. iba ang bicol na isipon sa ingles na isipon.caya nagbucas pa aco nin sarong blog sa mga rason na nasabi.

an sunod na tatawan co nin importancia iyo na mismo an titulo can blog na ini, an paghorop-horop o horop-horop..simple man lang para saco an horop-horop, iyo ini an mga panahon na nagsosolo kita pagcatapos nin halabang aldao...nagiisip can mga nangyari, can satong capagalan, can mga mangyayari pa.mga panahon na naghahanap kita nin saysay sa satuyang buhay.

pagcatapos can aldao, solo lang kita sa buhay na ini asin gusto tang maintindihan an misterio can buhay digdi sa kinaban na ini.gusto tang magcaigua nin dikit na liwanag cung saen kita maduman.nagdadangog kita sa catoninongan na haloy ta nang hinahanap.